Genesis 28

1Ma Aesak mikes Siekob be visali e misemae ni bit, “Natuxoli, bos makoe minuk. Nabit namit sepinien ak mi xouk. Nake xatuk tengan onateli ti natel ate-Kenan tova. 2Imak, ma uhe Mesopotemia e tim sa Betuel, tame ninom. E rute ak, ha upus pap nam Laban, e uhur atul maxoe tova nan tengan uteli itela.” 3Di, Aesak misa tuxolxatien mini bit, “Hi te Xeihen ituxol xat tetalien nam e isa horamue xil lihe holu minuk. Isak ni xouk mei uhe vatit moletin te vanut moletin xil holu. 4Hi ituxol xatuk itel vatimol xil xa listal lixo xouk ixoni ngan xa tetuxol xat avu nam Ebraham tetiamu. ▼

▼28:4 Sen 12:2; 17:5; 22:17

E melele xil xa ti imei, Hi itutou ni xouk tengan uleh sein tan xil vus xa xi tesa ni mi avu nam Ebraham tetiamu. Reitin, uhur tan xa, xosali, oda en nggoni ngan halesav tei tang.” 5Di, Aesak misil Siekob be Mesopotemia tengan ha ipus Leban xa be pap nan e nat Betuel tahal ut Eram.

Hi Pol ni Hitxatien te Xeih Tei Del Siekob e Biles Hisen Mei Be Isrel

Senesis 28:10-19; 35:9-20, 22b-26

10Siekob be reling vatimol nam xil e Bersiba e mika sen ba ve ut Haran e kantri tahal Mesopotemia xa be sotin. 11Melele xa meteneai be tan, xi bemei e rute tei xa bos e mingel en. Po hat tei, milung en, e pat. 12Melele xa por sae, xi metuve e pus suse tei xa vatite de tan e kusute be duxoh ut nesao, e masxaxa xil di langgusili labe nesao e di lamei etan. 13Siekob miketeh be nesao e pus Iahova misoh nesao e suse nen ak e biteni mini bit, “Inou Iahova, Hi xa Ebraham xal Aesak lutehusili. Tan xa di opat en, nisa ni minuk e mi vatimol nam xil xa listal lixo xouk. 14Vatimol nam xil mei lihe holu xa lihe holu. Ixoni ngan xa moletin misakras vavuli saxut tan xil vus te ut etan, moletin xil lisakras livuli sein ngan xil te vatimol nam xil. Xil lihe holu xa lihe holu lise sein ut xil ngasen e ut etan ha ituxoh ut xil e wes, e ist, e not, e ut xil mun e saot. E xouk itel vatimol nam xil muhe suse te tuxolxatien navan iha mi vatimol sav xil te ut etan. 15Unem xati xa inou, niti minuk e nisikoe xolok e ut xil vus xa uha en. Ti, nihur rilomun ni xouk umei e tan ak e ninastokoveinuk ti ha ituxoh melele xa nipol vuol ni naha xa natehit xati minuk.”

16Melele xa pus metuveen ak bus, Siekob mea e hilaep te vongien e bit, “!Reitin, Iahova li dat tak, e inou li natakil ti!” 17Ma xi, tinen mulul, e biteni bit, “!Aue li, xos rute ak be ut eo tova! Xos tim sa Hi da tak, e rute ak be puiteh teni xa be ut nesao. !Ei, uluk mikan pupu tengan nate inggak!”

18Ma melele xa ut milan, e makoe roroh, Siekob mea, po hat xa telung en e mikili ni misoh be simeleleen tei tengan ti inem xat naha xa tepusi. Bus di, nggur oel e midehi ba xati tengan vapisen ni xa rute ak be ut eo na Hi. Miling his rute ak be 'Betel' xa koute teni be 'nim na Hi'.

Bus di, Siekob be ut Haran, e tim sa pap nan, Leban. Melele xa pus atuli nan xalu, Siekob, eheien nan di e ngan xa be tasite xa hisen Resel, ma misis pap nan ni. Ma Leban biteni bit bos tang tengan ihuri, e itiamu, ipol mini mu huram ihe lu e he sav (7) tengan ixal rati. Melele xa Siekob milonge mak, xi besi xi e mae en. E melele xa huram lu e he sav (7) mei mitavi, Leban ien ti tavei tengan Siekob vahur Resel e lalohe relingi itel holesok nan xil. Leban ien bei tengan Siekob vata vuteili mun vengan pusi xa tuxolxatien na Hi di mini e polien xil vus nan. Ma, melele te tetalien nalu, Laban miluvosi e misa Leah nggur von Resel e mei mitetali del Siekob. E melele xa ut milan, Siekob pus kila sung xa xi tepat tang tetel Leah. Misak ni ien mikat tova tang. E melele xa ba pus Laban ve rin ak, xi maen ni tengan ihur Resel mun e wik xa ti imei xosxa ipol ni hitxatien tengan ipol mini huram ihe lu e he sav (7) mun. Ma Siekob maen rilomun ni.

E meulien tevi nan, holesok xil vus xa Siekob tepol ni, tuxolxatien na Hi teti mini. E melele xa di tepol mi pap nan, atou nan xalu tetel atuli tepolien nalu xalu lateleh horamue xil latehe holu. Di, Hi tesepin mini tehit melengien pipin tengan imea ra rute ak, e itilomun ihe ut sa tamen.

19